ثورة يناير - الحلقة الأولى

عمري ف يوم ما مشيت في مظاهرة

ولا حتى خطرت لي الفكرة

فاكر حد دعاني ف مرة

أيام جامعة ولا مذاكرة

طول عمري بعيد عن السياسة

وكلامي عنها في الخباسة

همي شغلي والدراسة

ولا شفت يوم شكل الرصاصة

وحتى يوم خمسة وعشرين

رحت شغلي مع الرايحين

وآخر اليوم تاني راجعين

قعدت شفت التليفزيون

لقيته خالي من المضمون

ورئيس تحرير شكله مأفون

بيتكلم زي المجنون

كلام مالوش دعوة بالواقع

بيقول شبابنا دا شباب واقع

وواحد تاني جاي بيدافع

بيقول شبابنا شباب رائع

قالوا دا شباب الفيس بوك

قاعد ع النت وبيعك

بتاع أغاني ورقصة روك

هيتمشى شوية ويفك

لقوا الشباب واقف ف الوش

وصوته عالي ما بيوشوش

شباب جريء ما بيتهوش

سدوا الطريق لقوه بيخوش

ضربوا الشباب ع الإيد والوش

ضربوا شباب رافض للغش

والتليفزيون بتاعنا يغش

ضربوا الشباب لكن ع الدش